Lunglei 3rd May: Vawiin chhun dar 12:00 khan DC Conference hall Lunglei ah naupang huaisen Laldinthara, Chanmari leh midang chhan nan a nunna hlantu tlangval huaisen Lalchhandama Pachuau (L), Rahsiveng te chu chawmawi an ni.
Heng mi huaisen te hian India President in naupang huaisen te chawmawina Uttam Jeenam Raksha Padak award 2010 leh Jeevan Raksha Padak award 2010 Lunglei DC, Pi M.Zohming-thangi IAS kaltlang in a dawng. Laldinthara hian Jeevan Raksha Padak chawimawina thuziak leh tangkapui leh Rs. 30,000/- dawngin nunna chan ta, Lalchhandama Pachuau hian Uttam Jeevan Raksha Padak chawimawina thuziak, Tangkapui leh Rs. 45,000/- a dawng thung. He huaisen chawimawinaah hian Union Home Minister-in a hming a ziak a ni.
Pi M. Zohmingthangi IAS, Lunglei DC chuan lawmman leh chawimawina te hi a hlu a, heng lawmman chi hrang hrang zingah huaisen vang leh midangte chhan nan a nunna hial pawh chan leh chan ngam te chawi-mawina chu a ropui bik a ni a ti.
Mipa naupang C. Laldinthara hian 11th June 2009 khan naupang pahnih Fakawma, kum 5 leh Hruaitea, Kum 4 mi chu thlan lung dah khawm chimin a delh tur chhan chhuakin a kut veilam zungpui chu tan ngai khawp a ni.
Lalchhandama Pachuau 18th July 2009 kum khan a thianpa Remsiama nen chawhmeh dapin Ruangte luiah an kal a, Chhandama hian a chapal chu tuiah titlain Remsiama hian chhar a tumna lamah tuiah hian a talbuai a, chu chu Chhandama hian chhanchhuah tumin tuiah hian a zuangthla ve nghal a, a thianpa hi harsa tak chungin vaukam tiauphoah a namchhuah theih laiin amah zawk chu tuiah hian a tla hlum ta a ni.
Nimina huaisen chawimawina hun hi Pu K. Lalhmingliana SDO (Sadar) chuan kaihruaiin, Laldinthara chhungte leh Lalchhandama chhungte atangin thusawi ngaihthlak ve ve a ni bawk.
No comments:
Post a Comment