NEIGRIHMS HOSPITAL KAN TLAWH

    Press Tour tura vailiam kan ni:

    Mizoram sawrkar, Information & Public Relation Deptt. bultumin North East Press Tour 2nd Batch-ah MJA member 10 te May ni 24, 2011 khan Aizawl atangin kan chhuak a, Aizawl Press Club kawt atangin I&PR Director Pu Jim K. Chozah leh MJA President Pu H. Zosangliana ten Press Tour-a kalte hi min vai liam (flag-off) a. Min hruaitu I&PR Deptt.a IPRO K. Vanlalsangi, (Tete-i) MIS  kaihhruaina hnuaiah, MJA lama kan hotupa R. Lalhmangaihzuala,  Gen. Secy. MJA Gen. Hqrs. ho chuan kan zin chhuak a ni.

    Thu hmahruai:

    Press Tour-a kan kal chungchang hi a indawt dana ziak chhoh pawh chakawm hle mah se a rem chiah lohna chen a awm a. Chipchiar ve deuh hleka ziak tul deuh bik te a awm dawn avangin, Press Tour kan neih tuma kan tlawh thenkhatte leh a kal ten kan hlawkpui mai piah lam a, midangte tan pawha hlawkna tlemte tal neih theih takah tiin, article pakhat ang leka han khung nghal vek chu a fuh chiah lo deuhva ka hriat avangin, ziak remchang hmasa deuh nia ka hriatte ka rawn thlur hmasa a, hei hi a chhan chu hmun thenkhat kan thlawhte hi a History hriat ve deuh tul leh han chhui zui ve deuh ngai thilte a awm vang a ni. A dang pawh la ziak chhoh zel kan tum ang chu.

    NEIGRIHMS HOSPITAL:

    NEIGRIHMS Hospital hi a hming ringawt kan hre lar ve hlur ringawt a, atakin article ziaktu ngei pawh hian vawi khatmah ka la hmu lova. Heti anga Press Tour kan neih azara a hmuhna chance leh chipchiar lem lo mah se a chanchin tlem a zawng hriat belh tur ka nei hi vanneih thlak ka ti hle.

    NEIGRIHMS tih hi, North Eastern Indira Gandhi Regional Institute of Health & Medical Science tihna niin, Shillong hmuna awm a ni. Damdawiin lian leh changtlung tak niin damlo khum 500 a awm a, hmanrua leh khawl changkang tak tak an neih mai piah lamah thawktu doctor thiam tak tak thahnem tak an nei a, Library lian leh changtlung tak an neih chu doctor thawk lai leh MBBS zirlai leh B.Sc. Nursing zirlai ten an chhawr tangkai hle bawk.

    NEIGRIHMS Hospital-ah hian MBBS zirna leh B.Sc Nursing zirna hmun awm nghalin, batch khatah mi 50 ve ve tan a zir theih a, North East State MBBS zirna Medical College nei lote chauhin NEIGRIHMS Hospital -ah hian seat (quota) an population a zirin an nei a. Mizoram pawhin seat 3 kan nei ve a, tunah hian Mizo MBBS zirlai 9 an awm mek nghe nghe. N.E State ten quota neih bak chu an mahni Hospital-a Entrance Test  buatsaiha tithaten MBBS an zir thin a, B.Sc Nursing-ah erawh chuan State ten quota  bik nei lovin NEIGRIHMS Hospital-in entance test-a ti tha tha 50 ten seat  an chang mai thin a ni.

    Hei bakah hian Postgraduates  zirna pawh awmin, 20th Annual Report 2009-2010 an buatsaiha tarlan danin  Postgraduates students (MD/MS) ah zirlai 8 lai an nei a ni.

    Thawktu lam:

    NEIGRIHMS Hospital-ah hian 20th Annual Report an buatsaiha a landanin, Teaching Deptt.ah 23, Faculty members - 41, Non Faculty staff - 698 an awm. Medical Superintendent hi Prof. A. Phukan a ni. Mizo Doctor hi 14 lai an awm a, Nurse-ah pawh Mizoram atanga chhuk thla Mizo Nurse 40 vel awmin, Mizo Hnahthlak hrim hrim phei chu 80 chuang vel NEIGRIHMS Hospital-ah hian an thawk nghe nghe a ni. Mizo Doctor thawkte hming hi han tarlan vek pawh a that tehlul nen hmun a heh deuh avangin ka han ziak lang ta lo mai a ni.

    NEIGRIHMS HOSPITAL, DEPTT. HRANG HRANGTE:

    NEIGRIHMS Hospital-ah hi a dintirh lai chuan Deptt. 4 chauh awma din tan a ni a, mahse, tunah chuan Deptt. hrang hrang 22 lai a awm tawh a. Nakinah damlo la pan duhtute an la awm zel turah ngai ila, hmun heh deuh mah se Deptt. hrang hrang awmte i han tarlang hrim hrim teh ang.

    1) Anaesthesiology, 2) Anatomy, 3) Biochemistry, 4) Cardiology, 5) Community Medicine, 6) CTVS, 7) ENT, 8) Forensic Medicine, 9) General Medicine, 10) General Surgery, 11) Microbiology, 12) Neurology, 13) Obstetrics and Gynaecology, 14)  Orthopaedics, 15) Ophthalmology, 16) Pathology, 17) Paediatrics, 18) Physiology, 19) Pharmacology, 20) Radio-diagnosis, 21) Radiation Oncology, 22 Urology te a ni. Heng bakah hian Store, Immunization, Casualty & Emergency, Central Library, Water Supply leh Electricity te pawh Deptt. hran vekin a awm bawk.

    In enkawlna chungchang:

    NEIGRIHMS Hospital-ah hi Hospital changtlung tak a ni a, hmanrua an neih that mai piah lamah a thawktute inpekna a sang hle a. Thawktu doctor te hian damlo en tur an nei lovang tih an hlau zawk mah niin a lang.

    Inentirna man a awm lova, ei leh in man a awm lova, khawl lian leh changkang, tha tak taka inenkawlna man a awm lo. Mizo damlo na tak takte phai hmun hla tak takah refer  an ni fo thinin, senso tam tak a ngai fo thin. Mahse, NEIGRIHMS Hospital-ah hi chuan phai hmun hla zawka cheng nuai tel sen theihna tur ang chiah khan cheng sang hnih/khat lek senga inenkawl mai theih a ni. Hei hi a chhan chu engkim a free vang a ni.

    NEIGRIHMS Hospital-a a dintirh atanga thawk tawh Mizo doctor, Dr. Daniala Associate Prof. Head of Deptt. Radiology chuan ka zawhna min chhan angin, damlo a tam thei ang berin min pan se tih hi kan duh a ni a, damlo phai hmun hla tak taka senso tam bawk si a, refer  an nih fo thin laia NEIGRIHMS Hospital-a refer  an ni ve thin lo chu mak a tih thu a sawi a. Hmun  hla zawk atanga damlo rawn patute chu  an lo ngaihtuah thin avangin admit  chungchangah pawh harsatna em em awm lovin a tihdan a awm thin thu a sawi. Hei bakah hian inenkawlna a that mai bakah sen so a tam loh avangin a tam thei ang berin pan se a duhthu a sawi a ni.

    NEIGRIHMS Hospital-a thawh doctor te hian an thawh phu tawk hlawh an hmuh thu sawiin,  thla tin thawktute hlawh atan hian thlatin sawrkar laipui chuan cheng vaibelchhe 4 chuang lai a seng thin a ni. Heti ang a nih avang hian doctor-te hian NPA  an la a, a hranpain private-a in entirna Clinic  hran an hawng lova, NEIGRIHMS Hospital-a damlote enkawlna kawngah an inpek pumhlum tawp thu a sawi bawk.

    A panna leh kan mamawh:

    NEIGRIHMS Hospital hi Hospital lian leh changtlung tak North East mipui ten kan neih a ni a, Shillong hmuna awm a  ni a, Mizoram atang pawhin hla lutuk lo leh pan harsa lutuk lo a ni.

    Shillong khawpui atangin 5/6 km vela hlaa awm a ni a, mahnia motor nei lem lo tan chuan Taxi emaw hire-a kal a ngai thin. Nitin damlo thahnem tak ten inentir turin an pan thin a, Mizo mipui tam tak damlo mangangte pawhin an pan mek reng a, hetih rual hian NEIGRIHMS Hospital la hrechiang lo leh pan nachang la hre tawk lo an la awm ve mek bawk. Hun lo kal lehzel turah nasa zawkin Mizo mipuite pawh hian NEIGRIHMS Hospital hlutna hi hriain kan la pan zel turah ngai ila, chuti ang anih avang chuan Mizo mipuite hian eng nge kan mamawh tih leh kan mamawh hi Mizoram sawrkar hian min tihhlawhtlin sak thei angem tih chu zawhna lian tak a ni.

    NEIGRIHMS Hospital chhehvelah hian ram ruak a la awm nual a, State dangte chuan Hospital bul hnaiah hian damlo mangangte thlenna tur House neih tumin hma an la mek a. Chuti ang a nih lai chuan Mizoram sawrkar pawh hian thil a la harsat hma leh tih theih a la nih lai hian Hospital chhehvel, a bul hnaiah ram lei dan a ngaihtuah thuai a, Mizo mipui damlo mangang tak tak, NEIGRIHMS Hospital pan thin ten Shillong khawpui hmun hla tak atanga pan buai ngai lo leh a bul hnaitea an thlen chilh mai theihna hmun tur an neih hi a tul takzet a ni.

    Shillong khawpuia Group YMA leh Branch YMA hruaitute, MSU hruaitute, Postgraduates Assn.hruaitute leh Research Scholar Assn. hruaitute pawhin chu chu an duhthusam a ni a, khunglai Shillong hmun velah Mizote tan tun dinhmunah mimal anga ram neih a harsat tawh laiin, sawrkar ang chuan thil harsa a la awm lova, chuvang chuan sawrkar hian NEIGRIHMS Hospital bul hnaiah hian ram lei thuai se, Mizo mipui damlo mangang ten thlenna tur KHUALBUK sak thuai ni thei se tih chu an duhthusam a ni.

    Thu kharna:

    NEIGRIHMS Hospital chungchang hrechiang duh tan an website: neigrihms.nic.in ah enchian theih a ni. Tunah hian doctor pawh lakbelh an tum mek a, hrechiang duh chuan an website atang hian enchian theih a ni.

    NEIGRIHMS Hospital-ah hian tarlan tawh angin Mizo doctor thiam tak takte, Nurse fel tak takte an thawh teuh bakah, Mizo thalai MBBS leh B.Sc. Nursing zirlai engemawzat an awm a. Lunglei Salem nula ngei pawh NEIGRIHMS Hospital hmunah hian a thawk ve nghe nghe. Ziak tur tam tak awm mah se a thui deuh tawh avangin chipchiar zawka hrechiang duh tan chuan an website tarlan atang hian kan belchiang leh dawn nia.

- V. Rokhawlkima
Joint Editor, Lunglei Times