Argentina leh Venezuela Salt Lake Stadium Kokata-ah inkhel dawn

    Celebrity Management Group organised in Kolkata khawpuia Salt Lake Stadium-ah Argentina leh Venezuela ten FIFA official international friendly match chu naktip Sept. ni 2 hian an khel dawn a. Argentina team players 19 te chuan Netaji Subhas Chandra Bose International Airport an thlawklut ta a, vawiin hian players dang leh team official nen mi 17 chuan India an lo thleng leh dawn a, chung zingah chuan Lionel Messi leh Barcelona-a a khelhpui Javier Mascherano te pawh a tel ve ang.
    Argentina team hi coach thar Alejandro Sabella leh a thachhang dawltu Julian Camino bakah players dang leh backroom staff ten India an zuilut a, Kolkata-a hotel Hyatt Regency-ah thlentir an ni.

    Salt Lake Stadium-ah hian mihring 120,000 vel an leng a, ticket an hralhchhuak tawh a, 24,000 zet an hralh tawh. A man erawh a tlawm lo : - Rs.700, Rs.1,000, Rs.1,550, Rs.1,860, Rs.2,060, Rs.2,470, Rs. 2,570, Rs.3,590, Rs.5,120. te a ni a, seat full veka hralh theih an in ring.
TV lamah pawh ram 152 zetah tihchhuah a ni dawn a, heta tang hian sum lakluh a thahnem hle dawn a ni. India rama mite tan chuan ESPN channel leh Bengali Channel atang tein a en theih ang.
    Argentina leh Venezuela te inkhel tur hian ngaihven a hlawh a, India ram chhunga sumdawng lian tak tak leh Bollywood star thahnem tak pawhin en an tum thu an sawi tawh hlawm a. Actor zingah Ranbir Kapoor leh Filmmaker Anurag Basu pawhin he inkhel hi en ngei an tum thu an puang tawh a ni. He inkhela tel ngei tur FC Barcelona Star, “Messidona” chu hmuh ngei an chak thu an sawi a ni. Salman Khan pawh he inkhel en tura beisei zingah a tel bawk.
A chunga kan tarlan tawh ticket man bakah khian a bika thutna siam box chhunga thu tur phei chuan ticket hi a sang alh alh hle a, Ticket pakhat man ringawt pawh hi Rs 7,50,000/- lai a ni nghe nghe.
    Ticket leitu tam zawkte hi chuan internet kaltlanga an lei niin, ticket leity 60% lai chu Kolkata pawn lam mi an ni nghe nghein, South India lam atanga ticket lei an thahnem hle a ni niin CMG Official chuan a sawi a. Ticket leitu tamtakte hi chuan travel agent atanga an lei a ni bawk.
    Hetih lai hian fans 1000 laite chu online hmangin ticket hi an book lawk bawk a ni.
    Argentina Coach thar Alejandro Sabella’n Venezuela leh Nigeria nena friendly Match atan players 26 a thlan chhuahah hian, Carlos Tevez chu Player tel lo langsar zual a ni.
    Squad : Lionel Messi (c), Angel Di Maria, Gonzalo Higuain, Javier Mascherano, Ever Banega, Eduardo Salvio, Martin Demichelis, Federico Fernandez, Ricardo Alvarez, Nicolas Burdisso, Mariano Andujar, Sergio Romero, Ezequiel Garay, Fabian Rinaudo, Nicolas Otamendi, Sergio Aguero, Pablo Zabaleta, Jonas Gutierrez, Javier Pastore, Luis Gonzalez, Lisandro Lopez, Cristian Ansaldi, Nicolas Pareja, Marcos Rojo, Jose Sosa, Esteban Andrada.