Zin leh thil tawn ho mai mai!

    Thu ropui tak han puak chhuah tur nei lem lo mah ila tun tum chu thu ho mai mai han ziak ve hrim hrim ka duh tlat! Mite angin Sap ram fan chungchang leh ram ropui tak tak fan chungchang ziak tur nei ve lo mah ila Hamara Desh (India) ram hmun thenkhat ka kal ve tawhnaa ka thil tawn, a ropui lam pawh ni lo, a ho mai mai lam zawk han ziak lan ve hrim hrim ka duh tlat! Ka ngaihtuah let leh chang pawh hian engemaw thenkhatte hi chuan tun thleng hian min la nuih tir ve thei nia!
    “Hriat lohna hian mi a ti mawl thin” an tih kha ka la hre reng thin. |awng ka thiam loh tamzia lampang sawi ka tum em em pawh a ni lo. Hamara Desh tawng Hindi thiam loh hi chu; Silchar kan pelh atang chiah hian a chiang tawlh tawlh a ni ber!
    Tumkhat chu Shillong-a kan thlenna Hotel pakhat City Hub nitain ka hria, Police Bazar bul lawkah khuan a awm. February thla a ni a, a la Shillong khua raih a, a vawt vik tek mai! Zing dar 8:00 thleng thlenga mut kha nuam deuh a ni! Chhun lamah Programme kan neih avangin tukthuan han ei maina tur kha a awm dawn lo tih hre bik tawh hek lo chuan, tukthuan han ei hma ringawt duh mah ila, chutiang zing dar 8:00 velah chuan Mizo ten chaw bik ta riauva kan neih Rice chu Hotel-ah an la peih awzawng lo mai a. Tukthuan aiah Breakfast kan ei ta ringawt a, ka thian pakhat chuan, “eng nge i ei ang?” tia min zawh chuan, “i lam ang ang kha a ni mai” tiin ka chhang a, ani chuan, “Puri hi duh ve mai em?” a ti a. Kei chuan, “A pawi lo” ka ti a, ani chuan, “Engzat nge i duh ve dawn” a tih chuan, “Pakhat a ni mai” tiin ka chhang a, Puri leh thingpui chu kan order ta a ni.

    Hun engemawtichen kan nghah hnu chuan, kan thil order chu a rawn thleng ta! Mizo hovin Ata kan tih chu Vai hovin Puri an lo ti chu niin, Ata tiin an Menu-ah khan ziak se chuan ka hrethiam ve hrim hrim tur hi a nia. Tawng ka thiam loh a leiah, ka thil order vai ho Puri per khat, chu pawh khap khat bial em pawh ni lo leh thingpui no tetakte khat ringawt ring chuan ka nileng ve thak a, kha mi ni a, ka riltam zia kha! Cherrapunjee hmunah tlai lam thleng khan eng eng emaw ei khan ka inhnawh puar ve mai mai a, mah se Rice ka ei loh avang khan engmahin min ti puar tak tak lo ni khan ka hre ber!
    Tumkhat leh chu Mangalore-a Penambur Beach-ah kan kal a, tuifinriat zau tak mai, kan hmuh chin tawk zawng zawng chu tui vek a ni a, tuichen ve hrim hrim kan chak si, kan kal thuk ngam chuang bawk zi lo. Tuia kan chen laia thlalak ve ngei kan duh a, nghalrek chen lek tuiah chuan kan han bawk a, tui rawn fawn hlup hlupin min rawn chim lai vel tak chu changin thla kan la ve ta a nih kha! Chutiang chen leka tui cheng chu ni mah ila kan hlim phian a, kan thianpa pakhat Tripura lam mi MK. Singh-a, Tripura hmuna Kohhran School-a kan Missionary Mizote nena lo thawk ho tawh leh lo inchiahpiah ve tawh chu kan zingah a awm ve a, Mizotawng pawh a thiam ve sawlh sawlh!
    Kei chu kekawr bul nen tui ka chen mai laiin, ani chuan kekawr bul pawh keng hek lo, Vai towel (Gamchha) a spelling hi dik tak maw? chu vengin a kekawr chu hlipin tui a han cheng ve a, tui rawn fawn hlup hlup chuan a Gamkha ven chu a han len phar dawrh a, kekawrte pawh a lo ha lo nge ni............. kan nui nasain kan hlimpuizia kha!
    Kan thiannu, Khasi pawh chu tuiah chuan a cheng ve bawk a, keini Baptistma chan dawn pawha lu hnim pil ngam lo khawpa tui hlau ngawt ai chuan a cheng thuk ngam zawk daih a, duhtawka kan chen hnu; tiau vuta kan awm ho lai chuan a mangang teh a sin! a chhan chu engdang vang ni lovin a kekawrte chhungah chuan tiauvut a lo lut nasa niin! Inthlakna mai tur lah a lo keng bik si lo! A tihngaihna hre lotuk kha aw!
    Chu kan thianpa MK. singh-a chuan a lawm, a Mizotawng thiam ang tawk tawk khan, “Lut tur kha lut lova, lut lo tur kha lut nih kha” a tia, mittui tla phunga kan nuih dun lah chuan ani chuan a awmzia reng a hre ve der si lo! Chu tawngkam,  “Lut tur kha lut lova, lut lo tur kha lut nih kha” tih chu kan hlimdun pui rei teh asin! Kan thian hnamdangte’n chutia kan nui nasa lutuk chu an ngaih a tha lo hial zawk a, a chhan min zawh chuan, a awmzia chu saptawng thiam ang angin kan han lehlin sak ve ta a, anni pawhin an hlimpuiin, a nui nasa saah an tang a, a tawpah phei chuan amah Khasi nu pawh chu thinrim tha ngam chiah si lovin a nui ve thei ta a nih kha!
    A tawp nan pakhat chiah han sawi tel leh hram ka duh chu, Agartala Airport-ah Guwahati lam pana thlawk tur kan ni a, kan thlawhna nghakin kan awm thap a, kan thlawhna a rawn thleng dawn tawh, kan thianpa pakhat chuan Air Hotess kha thlalakpui a chak tlat a, a be ngam chiah bawk si lo, tihdan kan ngaihtuah chhuak ta a lawm mawle! “A bulah sawn ka va kal ang a, ka hnaih lai takin thla lo la rawh aw!” a tia, Camera nen ka lo chang ta a nih kha! A hnaih lai ber chuan thla chu ka la ta ngei a, mah se thla la tlang an ni reng an landan atang chuan a hriat hlawl loh!
    Kan pu chuan, “Aw! khatianga thla lakpui duh hrim hrimte chuan, engtikah nge kan thlawhna a lo thlen dawn tihte talin han be ve la chutih lai tak chuan kan lo la mai tur a nia!” a tihte chuan nuih hi a la tiza angreng  zuk nia!
    Spice Jet, mi 180 chuan theihna chhungah kan thu ve thap a, kan thlawk chhuak tan ta! Thlawhna chhungah engmah ei tur reng reng kenluh an phal lo, tui takngial pawh min chhuhsak vek si! Mahse, a zia phian tho mai! Tui na na na chu a thlawnin an la sem vek a, Spice Jet-a thawk Air Hotess nula no nalh angreng tak tak, pawnfen seng chhing tak feng a, kawr var tight nalh angreng tak hate chu biak ve hrim hrim kan chak aleiah, tui in hal em em pawh ni lova tui kan in dil chhawk zut te kha aw!
    A remchan chuan nidangah a dang pawh kan la ziak ang chu!

-V. Rokhawlkima