French Open hmeichhe champion thar Li Na

    Roland Garros-ah Chinese nula Li Na leh defending champion Italian nula (Patil?) Francesca Schavione te darkar khat leh minute 48 an inhlap hnuah Li Na chuan 6-4 7-6 (7-0) a hnehna changin a champion ta a, Grand slam title a lak hmasak ber a ni a, Khawvela mihring tam ber Chinese ho zinga Gland Slam title la hmasa ber a ni ta bawk.
    Li Na hi kum 29 a upa niin he open-ah hian seeded 7 niin a bitum hi 5th seed a ni thung a, Serve-ah a chungnung zawka baseline atanga play-ah pawh a chungnung zawk. Li chuan, 'Naupang te ka nih lai atanga ka chak em em thin chu Grand Slam a final khel hi a ni a,  mi tam tak chuan champion turin ka upa tawhin an sawi thin a, ni e, upat hnuah ka beisei ram chu ka thleng ta a nih hi, thil awlsam tak zawng a ni lo chiang' a ti.

    He mite pahnih hi vawi li an inkhel tawh a, vawi hnih ve ve an chak. Heti chung hian khawvel thlirna atang chuan Schiavone hi chak zawk tura ngaih a ni a, mahse, rin kai lo zawkin a leh thal ta a ni.
    Asian players zinga grand slam title la hmasa ber ni ta Li Na hian kumin January thla khan Australian Open-ah Kim Clijtersd chu finalah tumin a hneh lova, hetia French Open champion a nih takah hian World No.4-ah a chho ta a ni.
        A naupan lai chuan Badminton a zir a, a chhan pawh a pa hi Badminton khel thin a ni. Mahse, a coach in a han en vang vangin Tennis khel chi ni zawka hriain thu rawn a pek bakah a nu leh pate a sawipui a, Tennis lamah kum 8 a nih in a kal tan a, kum khat hnuah China National Tennis Team zawm in kum 1999 khan professional a ni tan.
    Kum 2002 khan Tennis team chu chhuahsanin zirna lam a chhunzawm a, Huazhong University of Science and Technology-ah lutin Journalism-ah bachelor degree a nei ta a, hemi hnu hian team chu a zawm leh.Kum 2009-ah team chu chhuahsanin free player a ni ta a ni.
    Wuhan, Hubei, China-ah Feb 26, 1982 khan a piang a, kum 14 mi a nihin a pain a boral san. A san zawng 1.72 m (5 ft 7 1/2 in) niin Right handed a ni a, bakhand-ah chuan two-handed a ni.
    French Open-a champion hmaa a dinhmunah chuan Tennis atanga sum a lakluh tawh chu $4,797,858 a ni a, a single career record 376 - 858 a ni a, WTA title 4 la tawhin ITF 19 a la a, ranking-a a san lai berin No. 6 a ni a, tunah hian No.7 niin a champion avangin No.4 a ni dawn. Grand Slam-ah hian Australian Open a final a luh tih lohah chuan tun tum hi a luh lehna hmasa ber a ni a, Wimbledon-ah tum hnih quarter final a thleng a, US Open-ah tum khat Qtr. final a thleng.